Астана қаласының санитариялық-эпидемиологиялық бақылау департаменті қасиетті Рамазан айында дұрыс тамақтануға қатысты ақпаратты ұсынды, деп хабарлайды SaqTimes басылымы.
Департамент барша қазақстандықты жарқын Рамазан мейрамымен құттықтап, денсаулыққа қатысты қауіп-қатерді азайтуға көмектесетін мынадай ережелерді ұстануға шақырды:
- Егде жастағы адамдарға, созылмалы ауруларлармен ауыратын адамдарға, жүкті және бала емізетін әйелдерге, балаларға оразадан бас тартқан абзал.
- Ораза ұстауға бел бусаңыз, денсаулыққа қатысты мына ережелерді ұстануды ұмытпаңыз: артық физикалық белсенділіктен аулақ болыңыз, дұрыс тамақтаныңыз, темекі шекпеңіз.
- Ораза кезiнде қоректi заттардың, тұздар мен судың жеткiлiктi мөлшерi бар теңдестiрiлген диета маңызды, тамақ қарапайым болуы керек әрі күнделiктi тамақтан қатты айырмашылығы болмауға тиiс.
- Рамазан күндері ағзаны әлсіретпеу үшін барлық қажетті қоректік затты (ақуыздар, майлар, көмірсулар, витаминдер, микро- және макроэлементтер) алу маңызды. Бұл ретте тағамда жеміс-жидек, нан мен дәнді дақылдар, сүт пен сүт өнімдері, балық пен ет сияқты өнімдер болуға тиіс. Барлық өнім балғын болуы керек.
- Майлы және қуырылған тағамдардан бас тартқан дұрыс. Тамақ дайындау барысында майды майлы балықпен, зәйтүн майымен, ірімшікпен және тұздалмаған жаңғақпен алмастырыңыз.
- Құрамында қант пен май көп болатын кондитерлік өнімдерді қолданбаңыз, оларды табиғи тәттілермен — құрғақ жемістермен, пастиламен, балмен алмастырыңыз.
- Ауызашарды құрма немесе судан бастаңыз, негізгі тамақты сорпадан, салаттан бастауды ұсынамыз. Күні бойғы аштықтан кейін жеңіл сіңетін тамаққа назар аудару қажет.
- Ауызашар мен сәресі арасында денедегі сұйықтықтың қалыпты деңгейін ұстап тұру үшін мүмкіндігінше жеткілікті су ішуге кеңес береміз!
- Таңертең сәресіні өткізіп алмауға тырысыңыз, өйткені бұл күні бойы қандағы қант балансын сақтау үшін өте маңызды. Құрамында ұзақ сағаттар бойы энергияны баяу тарататын (дәнді дақылдар: арпа, бидай, сұлы, бұршақ және т.б.) күрделі көмірсутектері бар өнімдерді, баяу сіңірілетін клетчаткаға бай өнімдерді (кебек, астық дақылдары, жасыл бұршақ және т.б.), сондай-ақ ақуызға бай өнімдерді таңдауды ұсынамыз.
